23 Oct Pagaltzetatik Santa Grazirako zeharkaldia (GR10).
“Santu Guztieneko” asteburu luzean iparraldera joango da Arrastaka Mendi Taldea GR10-aren ibilbidera (Frantziako Pirenioetako ibilbide luzea). GR10-a Pirinioa ipar isurialdetik zeharkatzen duen ibilbide luzea da, Hendaiatik, kostalde atlantiarretik, mediterraneoko Banyuls-sur-Mer-era, 800 km inguru guztira.
Ostiralean, hilak 1, bederatzigarren etapa egingo dugu (Pagaltzeta – Bagargietako Lepoa). 22,5 km-ko etapa da. Ibilbide honetan ikuspegi zoragarriko parajeetatik igaroko gara eta Ilharritako cromlech-ak ikusiko ditugu. Okabe mendira (1.466m) igoko gara (Behe Nafarroko mendirik altuena) eta Pedroren etxolatik jarraituko dugu Bagargietako lepora iritsi arte (Iratiko Etxolak /Chalets de Irati). 
Larunbatean, hilak 2, Bagargietako lepotik Logibar-ako etapa egingo dugu. 20,2 km-ko etapa da. Ibilbidean hainbat mendi igoko ditugu (Arthanolatze eta Eskaliers esaterako) eta ikusmira zoragarriekin gozatuko dugu lo egingo dugun aterpetxera jaitsi arte, Logibar atrepetxera hain zuzen.
Igandean, hilak 3, Logibartik Santa Grazirako etapa tokatuko zaigu. Asteburuko etaparik luzeena da (30,8 km). Etapa honek ordea, xarma berezia dauka. Batetik, ingurune zoragarrietatik igarotzen delako (Holtzarteko zubia, Kakuetako arroila) eta bestetik, ibilaldiko basoengatik eta flora anitzarengatik. Ingurune hau, Europako txokorik ikusgarrienetakota dela esaten da.
Irteera honetan parte hartzeko interesa dutenek urriaren 29ean, asteartea, arratsaldeko 7,30ean, Iturriotz kaleko Ehunmilak-Arrastakaren egoitzan (Urbieta Etxearen parean) egingo den bilerara etorri beharko dute irteerako xehetasunak zehaztu eta zalantzak argitzera. Informazio gehiagorako gure webgunea bisita dezakezue www.arrastaka.net, edo egun eta ordu berean honako telefono zenbakira deitu bestela: 646 855 620.
Oharra: Iretera honetan parte hartu ahal izateko derrigorrezkoa da mendiko federatu txartela izatea.
Irteera honetan parte hartzen dutenak Arrastakaren irteeren araudia onartzen dute.
